Hebrews 1
God imi Man imi tebe numi weng kupka-emsa uta ko
(Jon 1:1-4, Fpai 2:5-11, Kol 1:15-20, 1 Jon 1:1-4, Rev 19:13)1Sugayok uyo God iyo yak ilep migik migik uyo kwep mek kafalepmata, imi weng uyo profet ko age ilami weng kem baga-emin tinum kwiin tagang imi suun kup kupka-e-balata, ita tebe nulumi olal fegep tam iinsip iyo weng uyo baga-e-bii una una kemsip kale minte, 2am afungim, daan mitam tolon o agan-bulu bom tebesup koyo, God ilami weng uyo man imi diim kobelata, man iyo nuyo baga-emsa kale, man beyo God iyo tebe ulaa du-nalata, bogobe-nala e, “Son-temu uyo, alugum mufekmufek uyo kwaap-kami yak kapmi sagaal diim abelan-temu o,” age-nala e minte, God iyo man ilami sagaal diim ku-tele kafin koyo telela ko no kesa ko. 3Kale man beyo atin tinum tambal utamta, nuyo ilami Aalap iyo kafalebelata, God iyo atamupta e, atin tambal kalaa agan-nuubup e minte, man yagal mungkup fen ki ilami Aalap God ilatap kale, imi weng boyo titil kup tebe-nulu e minte, weng bota tebe mufekmufek alugum uyo kuntuk saanem-nuubu kale, man beta tebe fengmin takan kemin umi ilep uyo telela kobe-nala e, yagal mitam kamogim ke-nalata, atin abiil tigiin kayaak God imi sagaal ipkuk diim kal ton-bom nuuba ko.
God imi Man ita ita ke ensel kubaganip imkasa uta ko
(Fpai 2:5-11, Kol 1:15-20, Hib 2:5-18, 3:1-6)4Kale Aalap imi win kobesa bota tebe ensel imi win uyo kubaganu imkaa atin tambaliim kup keluta, man yagal mitam ensel imi atin kamok aligaap kelata, alugum ensel iyo imi afak tem iinsip ko. 5Kale nuyo utamupta, boyo aafen kalaa agan-bulup kale, sugayok uyo God iyo ilami Man imi bogobe-nala e,
- “Kabo nimi man kale, kamano koyo kaalap niyo ulaa kamduli mitam nimi ogok uyo waafuu kwep unon-temap o,”
- “Niyo imi aalap kebeli e minte, ita nimi man kepnela no kelan-temup o,”
- “Ibo deng tebe-bom-nilipta, nimi man iyo bogobe-nilip, ‘Kabo numi God o,’ agan-bom-nilipta o,”
- “Nalami ensel aa ogok tubulin aa iyo telela imoli mitam dulul ong sagam fuunbu ulutap aa-e min, at dong kena-bulu mufekmufek yuut binimabu ulutap ke nimi ogok uyo yuut dital fagaa ogok kem-nuubip o,”
- “Kabo God kale, suun kup kamok king kelin kup bom-nalapta, tol kuguup uta kup ku-nalapta, kapmi unang tinum iyo tiin mosap ko.
- “Kamaki magam tem kutop uyo kamogim kapkal kafin koyo telela kolap mitam sii molu e, abiil ugol mungkup kalapmi titil uta telela ko no kesap kale,
- “Kabo nimi sagaal ipkuk ilo keng kal ton-balapta bole, son-temu uyo, kapmi waasi iyo imdep daalita, kapta kamok kelapta, kapmi weng kup tinangka-bom kapmi afak tem kal nan-temip o,”
Copyright information for
TLF